Aur khuda tamashayi..!

Raat aur taareeki
Tanhayi aur ghum
Chubhte lamhe
Musalsal koft
Dil soz aatish...
Bikhre huwe khwaab
Aur mein...
Judna chahta hun
Magar taar taar
Bheetar tak majrooh
Moride ilzaam kaun
Kis ko mujrim kahun
Kis ki sifarish karun
Dum todti ummeed
Magar pukhta imaan
Aas roz-e-roshan ki
Lekin...
Yeh zarb hoti zarbein
udhed bun, beem
Justuju khud ko paane ki
Koshish usko samjhaane ki
Abhi tak faqat nakaami
Magar
Wujood hai toh yaqeen hai
Mehnat raaigaan na jayegi
Milegi mujhko,
Usse milna hi hoga
Chaahe zameen doz hi ho
Zeest se gila kaisa
Agar khuda ki marzi hai
Phir sab bekaar hai
Drama hai
Ishq bhi tamasha hai
Husn bhi tamasha hai
Aur khuda tamashayi..!

- Khan M. Asim... 16/03/2016... 02:01 AM..!

Kitna aasaan hai ilzaam kisi ko dena..!

Kitna aasaan hai ilzaam kisi ko dena
Kitna mushkil hai naam pe tohmat sehna


Unse aankhon mein mila ke aankhein
Baat bhi kehni hai aur hai chup bhi rehna
...

Muntashir hain ke khwaab adhoore nikle
Aur hai mushkil ke khwaab hai unse kehna


Humko baandhe hai jazbaat ki kaisi zanjeer
Raat bhar qaid mein tanha sulagte rehna


Dard sehne mein maharat bhi hui hai Asim
Warna mushkil tha halaat mein zindah rehna!
- Khan M. Asim... 28/02/2016... 10:51 PM..!

Jism ek ghar hai..!

Jism ek ghar hai
Jis mein rooh basti hai
Faqat woh ishq karti hai
Faqat tumpe woh marti hai
Muhabbat ke charaghon se...
Hazaaron armaan khilte Hain
Hazaaron khwaab jagte Hain
Isse takleef na do tum
Zara si ik thasak se bas
Yeh armaan na bikhar jaayein
Kahin na Khwaab mar jaayein
Woh Rooh beghar na hojaye
Mujhe ulfat se dekho bas
Mein har lamha tumhara hun!
- Khan M. Asim.. 26/02/2016... 02:08 AM..!

Bekhwabi..!

Shab ki aakhri paher
Kaanpta dil
Aur
Maut ki aahat..
Anjaan tarangein...
Zahen ko bedaar karti hain
Bad-hawasi o bekhwabi
Jism ko nichod rahi hain
Ajeeb uzr hai
Zehen maflooj hai
Neend ka shaiba tak nahin
Shor hi shor
Khoon kharaba
Awaazon ka hujoom..
Koi jung chidi ho jaise...
Bas ek bahes hai
Khud se, muhabbat se
Woh muhabbat
Jo ab chidhaane lagi hai
Woh Muhabbat
Jo ab jalaane lagi hai
Woh Muhabbat
Jis se dil bezaar hai
Woh muhabbat
Jo bilkul bekaar hai
Ajeeb aalam hai khudkalami ka
Bekhudi bhi ab
Tukdo mein bat chuki hai
Tamam manzar siyaah ho chuke
Doob rahi hai har umeed
Subah ka tara bhi ghata mein hai
Chaand poonam ka hai
Ya amavas hai
Kuch sujhai nahin deta
Yeh taareekiyon ka safar
Bada taweel hai
Aur safar hi goya manzil bhi
Yeh tareekiyan hi noor banengi
Aur yeh jism usi mein dhal jaayega
Tab talak,
Kashmakash jo jaari hai
Isko saansein mazeed dete hain
Aadmi aadmi ka dushman hai
Aadmiyat badi bhayanak hai
Kaun jaane ke kaunsa kona
Uski turbat, makaan ban jaaye
Itni islaah magar zaroori ha
Ke aadmi deshbhakti mein
Kum az kum insaan banjaaye..!

- Khan M. Asim... 22/02/2016... 03:10 AM..!

Adalat ke darwaazon tak..!

Zindagi,
Rangeen se
Safed-kaali hogayi
Ek aur karvant
Safar-e-hayaat mein...
Zulm aur aahon se
Insaaf ki panaahon tak
Sahafat ke galiyaaron se
Adalat ke darwaazon tak
Ghoomti ghaamti
Dar ba dar
Faaqon se tilmilaati zeeest
Ek tawaif
Daulat ki pujaran,
Zindagi
Kheir..
Jo bhi hoga
Dekhenge..!

- Khan M. Asim... 11/02/2016... 03:15 PM... Advocates' room, City Civil and Sessions Court, Bombay..!

Yeh saalgirah mukhtalif hai..!

Pichli bahaaron se
Yeh saalgirah mukhtalif hai
Ab woh kashmakash nahin baaqi
Ab woh justuju zara kum hai
Magar aarzuon ke kohsaar...
Qayam Hain
Tamannaon ke jazeerey
Tishna Hain
Nigaahon ki betaabi
Ab bhi taab rakhti hai
Khayalon pe
Tumhari hi hukumat hai
Ehsasaat pe tumhara raaj
Dil-e-naatwaan tumhara aseer
Abhi bahut si basant aayengi
Magar tab sukoon hoga
Chunke,
Intezaar ke lamhey khatam hone ko Hain
Yeh saal, yeh saalgirah
Sang-e-meel honge
Bahut jald
Musafir ko manzil milegi
Bahut jald
Aye dilnasheen
Yeh khanabadoshi khatam hogi
Hum ek honge
Aur hamara apna jahaan
Yeh saal bahut Mubarak hai
Yeh bahaar azeem hai
Mubarak Mubarak
Zindagi ka yeh haasil..!
Happy Birthday Arpi  
- Khan M. Asim... 02/01/2016... 11:39 PM..! Happy Birth Day Arpita Aparna Sarkar 

Tariq bin Ziyad

Ghodon ki maghroor taapon se
Samandar ka seena chalni hota raha
Magar woh khush tha
Khidmat mein
Apne rabb ki makhlooq ki
Woh jaanta tha
Yeh lashkar koi aam lashkar nahin
Unke ghungraale baalon waale
Barbar saalaar ki nigaahein..
Samandar se bhi gehri theen
Jinhein dekh kar
Samandar bhi makhmoor hua
Woh goya koi uqaab tha
Doorandesh, nidar, jaanbaaz
Woh jis ne apne rabb ki khushnoodi ke liye
Tegh o sipar uthayi thi
Usko na thi
Takht o taaj ki chahat
Belous khaadim
Taweel safar ke baad
Yeh lashkar yahan pe pahuncha tha
Magar yeh kya?
Usne toh apne jahaaz hi jala diye..
Behr-e-zulmaat hairaan tha
Yeh toh deewangi hai
Sad fi sad
Undlis ka saahil cheekh pada
Malaik sajdah rez huwe
Magar
Uski peishaani chamak rahi thi
Hawayein uski fateh ka
Parwana de rahi thin
Lekin saamne,
Hispaniya ka azeem lashkar
Usse rondhne ko machal raha tha
Bijliyaan thi nigaah mein uski
Toofaan uske tha baazuon mein
Taareekiyon mein woh jaanta tha
Uska lashkar haanp raha hai
Ghodon ka dil kaanp raha hai
Magar
Usse yaqeen tha madad milegi
Aasmaan tha fateh ka zaamin
Woh sar-ba-kafan
Chattaan pe khada
Aur aasmaan
Goya uske qadmon mein
Khitaab uska tha
Lafz saahir ka
Uske alfaaz mazboot
Iraadeh musammam the
Kuffar ke lashkar se ghabrana nahin hai
Tadad gar kum hai darr jaana nahin hai
Ladho ke tum imaan waale ho
Badho ke tum Quran waale ho
Apne haathon se taqdeer bana lo apni
Kalima-go ho toh shamsheer sanbhalo apni
Uske qadmon mein
Chand lamhon mein
Undlis ke khazaane the
Magar,
Maal-e-ghanimat na usko rok saka
Kooch usne shumaal ko kar li
Yeh kahani hai Ibne Ziyad ki
Zindagani hai ibne ziyad ki
Roz usko fajar mein paoge
Ik sitarah saher mein Tariq hai!
- Khan M. Asim... 18/10/2015... 02:13 PM.. ‪#‎TariquebinZiyad‬

Bula lo apne toofaanon ko sochte kya ho

Bula lo apne toofaanon ko sochte kya ho
Jo samandar ho toh shabnamon ko dekhte kya ho
Muqaddar mein likhi hogi toh maut bhi Manzoor
Magar hum jaan nisaaron ko kauste kya ho!

23/08/2015.... Asim

Baatin hai tu maana zaahir bhi kabhi ho

Baatin hai tu maana zaahir bhi kabhi ho
Toor ka jalwah meri khaatir bhi kabhi ho!

Woh sirf magar kyun rahe ghazal ka markaz
Woh Shamm-e-faroza shayer bhi kabhi ho!

Yeh maana humin hain na-paak-e-jahaan par
Haan gard mein lipta taahir bhi kabhi ho!

Hum dard ki mehfil, ek bazm hai uski
Woh kyun rahe ghar mein muhajir bhi kabhi ho!

Yaaron ka basera, aghyaar ka pehra
Khilwat mein kahin woh haazir bhi kabhi ho!

Mein kyun usse dekhun khushbakht salamat
Manzar ka mere woh naazir bhi kabhi ho!

Ghalib sa ho lehja miley Iqbal ka darja
Alfaaz mein Asim, Sahir bhi kabhi ho!

- Khan M. Asim... 16/05/2015... 01:29 PM..!

Translation

Baatin hai tu maana zaahir bhi kabhi ho
Toor ka jalwah meri khaatir bhi kabhi ho!
Accepted you are hidden but appear sometime
Create Lightening of Toor for me sometime

Woh sirf magar kyun rahe ghazal ka markaz
Woh Shamm-e-faroza shayer bhi kabhi ho!
Why she should be the centre of poems only
That luminous candle should be poet sometime

Yeh maana humin hain na-paak-e-jahaan par
Haan gard mein lipta taahir bhi kabhi ho!
Accepted that i am the dirtiest in the world
But that pious must face the mud sometime

Hum dard ki mehfil, ek bazm hai uski
Woh kyun rahe ghar mein muhajir bhi kabhi ho!
I am life of pain, and then there is her comfort
Why should she relax, migrate sometime

Yaaron ka basera, aghyaar ka pehra
Khilwat mein kahin woh haazir bhi kabhi ho!
Friends around or rivals surround
She must meet alone sometime

Mein kyun usse dekhun khushbakht salamat
Manzar ka mere woh naazir bhi kabhi ho!
Why should i watch her happy and safe
She must be spectator of my joy sometime

Ghalib sa ho lehja miley Iqbal ka darja
Alfaaz mein Asim, Sahir bhi kabhi ho!
Ghalib's accent and Iqbal's excellence
Asim's words be like Sahir sometime!
*ghalib, Iqbal and Sahir are great urdu poets..!
- Khan M. Asim... 16/05/2015... 01:29 PM..!

Pyaar suna tha liberation hai pyaar suna tha aazaadi hai

Pyaar suna tha liberation hai pyaar suna tha aazaadi hai
Lekin jab pinjrey mein aaya tota toh bas ik qaidi hai
Soney se saji hain qafas ki salaakhein heerey ka hai taala
Jisko samajh beithe the mohabbat woh makdi ka hai jaala
Jisko dil ke khoon se seencha woh dasne ko ready hai
Pyaar suna tha liberation hai pyaar suna tha aazaadi hai
Lekin jab pinjrey mein aaya tota toh bas ik qaidi hai..!

Aankhon mein saiyyaad ki usne sapne buney the saare
Udna chaahe udd na paaye pankh katey hain saare
Zaalim ko di raaz ki chaabi, saans ussi ki bhedi hai
Pyaar suna tha liberation hai pyaar suna tha aazaadi hai
Lekin jab pinjrey mein aaya tota toh bas ik qaidi hai..!

Aazaadi ki chaah mein parinda cheekh raha hai kab se
Lekin uski fariyaadon ko bhool gayi woh kab se
Uska kehna aazaaadi toh pinjrey mein hi dedi hai
Pyaar suna tha liberation hai pyaar suna tha aazaadi hai
Lekin jab pinjrey mein aaya tota toh bas ik qaidi hai..!

- Khan M. Asim... 16/05/2015... 10:17 AM..!

Khwab hai woh bahishte pekar

Khwab hai woh bahishte pekar
Sach kahun toh zindagi uljhan

Maahru woh, phool woh shabnam
Dar haqeeqat hai dard ka maskan

Banke amrit khayaal mein rehna
Nichod kar dil kar lia manthan

Aap beeti kisey sunayein hum
Jhulas rahe hain aur hai tadpan

Ishq Asim faqat yeh jaana hai
Bekhudi hai aur hai pagalpan!

- Khan M. Asim... 11/05/2015... 06:04 PM..!

Betaab dil ki kali khil rahi hai..!

Betaab dil ki kali khil rahi hai
Jo tumse hamari nazar mill rahi hai
Haan nazdeek aate hi aasaan Hui hai
Ab tak jo humpe mushkil rahi hai..!

Ghazab dha gayi yeh muskaan hum pe
Adaon se hum pe haan bijli giri hai
Kasam se batate hain tumhare raaze ghum hum
Hamari kahani Yeh dil ki lagi hai
Yeh jalwa tumhara zamin hil rahi hai
Betaab dil ki kali khil rahi hai
Jo tumse hamari nazar mill rahi hai
Haan nazdeek aate hi aasaan Hui hai
Ab tak jo humpe mushkil rahi hai..!

Nahin koi chehra tumhare siwa ab
Nahin koi ulfat tumhare siwa ab
Tumhi aarzoo ho tum hi har khushi ho
Nahin koi apna tumhare siwa ab
Yeh masgaan Yeh abru qaatil rahi hai
Betaab dil ki kali khil rahi hai
Jo tumse hamari nazar mill rahi hai
Haan nazdeek aate hi aasaan Hui hai
Ab tak jo humpe mushkil rahi hai..!

- Khan M. Asim... 10/05/2015... 07:07 PM... Train..!

Nazara..!

Koi hamari nazron ko
Kuch aur nazara dikh la de
Tujhe dekh ke ek nazar zalim
Hum saare manzar bhool gaye!
Khan M. Asim...08/05/2015... 01:01 PM..!

Nathni..!

Mere dil mein gad gayi haiy teri nathni
Mere dil ne bhi toh haiy meri na suni...
shaam sawere dil mein hai
Ab Yaar teri nathni, nathni nathni..
Mere dil mein gad gayi haiy teri nathni
Mere dil ne bhi toh haiy meri na suni..!

Neino mein dubakar tu ne
Kar dia mujhko pagal
Meri qabar ka kutba ban gaya
Tera kaala kaala kajal
Teri ek nigah woh zalim
Mera seena kar gayi haiy chalni chalni
Mere dil mein gad gayi haiy teri nathni
Mere dil ne bhi toh haiy mer na suni...
shaam sawere dil mein hai
Ab Yaar teri nathni, nathni nathni..
Mere dil mein gad gayi haiy teri nathni
Mere dil ne bhi toh haiy meri na suni..!

Ab tere bina dil ko mile na sukun
Tu hi bata mausam se mein kya kahun
Tujhe dedun sab nazrana
Teri baahon mein haiy jiyun marun
Ab Mann marzi Yeh haiy nahin chalni
Haan teri hi sab se baat haiy karni
Mere dil mein gad gayi haiy teri nathni
Mere dil ne bhi toh haiy meri na suni...
shaam sawere dil mein hai
Ab Yaar teri nathni, nathni nathni..
Mere dil mein gad gayi haiy teri nathni
Mere dil ne bhi toh haiy meri na suni..!

- Khan M. Asim... 06/05/2015.. 09:36 PM.. Train..!

Honton ke aabshaar se seraab kar mujhe..!

Honton ke aabshaar se seraab kar mujhe
Zulfon ki iss bahaar se shadaab kar mujhe
Tere bagher koi keemat nahin jahaan mein
Jaane jahaan tu pyaar se naayaab kar mujhe
Honton ke aabshaar se seraab kar mujhe..!

Mausam hai, chaandni hai, uspe tu mehjabeen hai
Saare jahaan mein koi tujhsi kahan haseen hai
Baahon mein inn sama kar jee bhar ke pyaar kar le
Yeh aakhri hai lamha phir zindagi naheen hai
Honton se choomkar inn seemaab kar mujhe
Honton ke aabshaar se seraab kar mujhe
Zulfon ki iss bahaar se shadaab kar mujhe
Tere bagher koi keemat nahin jahaan mein
Jaane jahaan tu pyaar se naayaab kar mujhe
Honton ke aabshaar se seraab kar mujhe..!

Banjar zameen Yeh dil ki gulzaar ho rahi hai
Jab tujhko dekhta hun taiyyaar ho rahi hai
Kaajal se ek mujhpe bas waar ho rahi hai
Ab zindagi Yeh jaana dushwaar ho rahi hai
Aise tu door reh kar na betaab kar mujhe
Honton ke aabshaar se seraab kar mujhe
Zulfon ki iss bahaar se shadaab kar mujhe
Tere bagher koi keemat nahin jahaan mein
Jaane jahaan tu pyaar se naayaab kar mujhe
Honton ke aabshaar se seraab kar mujhe..!

- Khan M. Asim... 05/05/2015... 10:35PM... Train..!

Woh cheen lega wujood bhi tum se

Woh cheen lega wujood bhi tum se
Jisko masnad pe tum bitha aaye
Tum ko lagta hai tum amaa'n mein ho
Mein samajhta hun sab luta aaye!

Khan M. Asim.. 23/04/2015... 04:29 PM..!

Housley ka tu mere kya muqabla kar payega

Housley ka tu mere kya muqabla kar payega
Kashtiyaan apni jala ke saahil pe tu kya aayega

Teer hain aur na sipar hai haath khaali hain mere
Maarna hai maar de, tu magar mit jayega

Lab pe kalmae shahadat, dil ba-imaan rushnaa
Zulm Tera kaamraan kyun bhala ho payega

Kaargar Yeh Tera fitna aur kya ho payega
Jhoot ke mehlon mein beitha sach se tu mar jayega

Mustufa ke naam se mansoob gar hojayega
Dekh deewana Tera Yeh jahaan ho jayega

Jald tu bhi dekhna lamha woh bhi aayega
Kalmae tawheed sang yeh jahaan dohrayega

Khud aitmadi ho buland toh jahaan Tera hua
Naatwaan Asim se bhi aasmaan dar jayega!

- Khan M. Asim... 03/04/2015... 02:53 AM..!

Noor-e-Nazar!

Hawayein nawazishon ki chalana mere khuda
Noor-e-nazar ko bad se bachana mere khuda

Sachchi dagar dikhana, aamaal nek rakhna
Kirdaar-e-Fatima se sajana mere khuda

Kal ja ke Yeh karein haan duniya mein naam roshan
ILm-o-hunar ka dede khazana mere khuda

Hamesha rahein salamat, haq ki banein alamat
In ke hi geet gaaye zamana mere khuda!

- Khan M. Asim... 16/03/2015.. 08:40 PM...
A gift to beautiful daughters from their poor uncle.. ‪#‎Amjad‬ Khan bhai...

Hum dogle mard!

Hum Mirreekh ke musafir
Tehzeeb o tamaddun ke muhafiz
Bada hi naaz hai humko
Hamari tareekh pe, saqafat pe
Hamari iqdaar sab se aala hain
Hamara akhlaq sab se afzal hai
Jaante hain kyun?
Kyunke hum dogle hain
Hum ne kabhi....
Apne grebaan mein jhaanka hi nahin
Warna khayal o khwab ke yeh mahel
Kab ke masmaar ho jaate
Aur munhadim ho jaati
Hamare jhoot ki har deewaar
Aurat kya hai? uski kya awqaat...
Koi haisiyat hi nahin,.
Hum jins parast
Sirf nochna jaante hain
Aakhir ko hum mard hain
Hum jo chaahein karein
Aurat sirf araam dene ke liye bani hai
Aurat ek shai hai,
Hamare istemaal ke liye...
Na na na...
Hum toh usko devi maante hain
Uske qadmon ke neeche jannat hai
Aurat hamari izzat hai
Ghar ki raunaq hai,lakshmi hai
Lekin jab usko dekhte hain
Toh hamari nigaahein...
Larazti hain, ubalti hain
Phir chaahe woh,
Kisi bhi roop ya umar ki ho
6 ki, 16 ki ya 36 ki
Usko choone ka haq hai humko
Iss mein kaisi sharam,
Humein toh fakhr hai
Apne maazi pe, apni kartooton pe
Aurat to devi hai
Hum hain uske daas
Haina,
Hum sirf baaton ke sher hain
Amal kaun karta hai
Hum dogle hindustani
Hum dogle mard!
- Khan M. Asim... 06/03/2015... 01:56 AM..!


Translation

We the Mars voyagers
Guards of culture and civilization
We are immensely proud of
Our history, our tradition
Our values are greatest
Our behaviour is the best
Do you know why?
Because we are Hypocrites
We never...
Cross checked ourselves
Otherwise this hallucination
Would have been dead long ago
And must have been razed
Every wall of our lies
Who is woman? What’s her value?
She has no value
We, the skin lovers
Knows only pinching
After all, we are men
We do what we want
A woman is born to satisfy
She is just a thing
For our usage
No, no, no...
We believe her as deity
There is heaven beneath her
She is our pride
She enlightens our abode
She is the prosperity
But when we gaze at her
Our eyes shiver, simmer
Then let her be of
Any appearance, any age
Be it six, 16 or 36
We have right to feel her
What shame in it?
We are proud of,
Our past, our deeds
Woman is a deity
And we are her disciples
Aren't we?
Just the jerks
We don’t practice (what we preach)
We the hypocrite Indians
We the hypocrite men!
- Khan M. Asim... 06/03/2015... 01:56 AM..!

Ishq kar beithe un se qayamat hui!

Bahut aarzoo thi humein zindagi ki
Ishq kar beithe un se qayamat hui
Yeh aalam hai ab huwe khilwat gazidah
Nazar ko milaane se shaamat Hui
Bahut aarzoo thi humein zindagi ki
Ishq kar beithe un se qayamat hui!

Woh zulfon ki jhurmut woh pehlu mein girna
Woh sheereen si talkhi, tabassum se chidna
Woh daste Mubarak, woh lamse nosheena
Nigaahon mein lipte nazaaron mein phirna
Bahut se kiye the yahan ahad o paimaan
Magar aaj dil ko malamat Hui
Ishq kar beithe un se qayamat hui!

Bahut woh jahaan mein haan mash-hoor honge
Husn o ada pe woh maghroor honge
Magar aah dil ki woh seh na sakenge
Mohabbat ko royenge, majboor honge
Humein hai yaqeen woh Yeh aa ke kahenge
Ke hum ko kiye pe nadamat Hui
Ishq kar beithe un se qayamat hui
Bahut aarzoo thi humein zindagi ki
Ishq kar beithe un se qayamat hui
Yeh aalam hai ab huwe khilwat gazidah
Nazar ko milaane se shaamat Hui
Bahut aarzoo thi humein zindagi ki
Ishq kar beithe un se qayamat hui!

Khan M. Asim... 08/11/2014... 08:47 PM..!