Jungle Ki Shehriyat..!

Jungle ki shehriyat thi paththar ke sab khuda they

Hum poojte rahe par devta khafa they

Dhakne ko perhan the na chupne ko hi nasheman

Hum kaat-te rahe sar unpe huwe fida they

Kya mushkilein na aayin kya aandhiyan na tooti

Haan lad rahe they khud se khayal jo juda they

Kya gumaane bandagi tha kya nashaye tishnagi tha

Jab bharam hamara toota ranjoor aah nida they

Unhein khudsari ne maara jo jiye the baazuon pe

Jo kare they shehsawari sab halqa ba qaza they

Jo chupey the nashtaron se jo dare they qatilon se

Ab kaun yeh bataye woh ghalat the ya baja they

Siyaah ulfaton ke saaye huwe noor mein huwaida

Kaise batayien ASIM woh jaza they ya saza they

Kirdaar khoobsoorat ifkaar mein bhi achche

Kyun todne lage gul jo dast ba dua thay

Woh khuda hi ban ke maane jo aadmi na nikley

Bekaar jo sada they bigdi hui adaa they

Hum ko yaqin hai tujh pe bigdi banaane waale

Jo aaye they ku-e-maqtal shayad teri raza they

Jo takhaiyulon se ubhre huwe ishq mein mujassam

Ab lag raha hai ASIM woh lamhe bawafa they!

- Khan M. Asim... 07/09/2011... 02:21AM... After a long interval!