Mein abhi tak ghulaam hun shayad!!!

Na jaane kya hua hai aaj subh se
Zahen pe bojhal si ik ibarat hai
Takhaiyulaat abr alood se hain
Ek dukha'n hai meelon jaisa...
Na koi chaahat, na koi haajat
Bahut masroof hun, nahin bhi hun
Haalat saazgaar hain yun toh
Phir yeh kashmakash kyun hai
Ajeeb vehmi se lamhey ke
Saath tazbazab bhi pinha'n hai
Kab se khud ko jaga raha hun mein
Jab ke din hai badi mussarrat ka
Mulk aazaad hai, jashn bhi hai
Magar na jaane kya huwa hai
Ke mein khush toh hun,
Magar nahin hun...
Mujhe yeh khauf ke baadal satate hain
Yeh andhi bheed, yeh pagal darate hain
Kahin Ishrat ke khoon ke aansu,
Kahin Shahid ke khoon ki dhabbey,
Kahin dhamakon mein jaan-bahek masoom
Kahin fasaadaat ke murdey,
Chahar simt se hamla-aawar hain...
Kab se koshish hai, bhaag jaon mein
Magar yun jakda hai ke uth nahin sakta
Desh aazaad hai, dastoor rakhta hai
Mein abhi tak ghulaam hun shayad!!!

- Khan M. Asim... 15/08/2013... 01:39 PM!