Udaasiyon ka Hamla!

"Udaasiyon ka Hamla"

Safar taweel hai
Yeh mein jaanta tha
Mushkilon se waqif tha
Magar haalaat,
Bad se badtar ho rahe hain..
Sawaal doulat ka nahin
Ana ka hai...
Khudi ka hai..!
Kisi ki bewajah talkhi
Kisi ke tu tadak jumley
Kisi ka nigah uthakar
Bhanwein tana kar dekhna
Kisi ka nazrein pher lena
Qalb o zahen ko jhinjod rahe hain,
Maano ab koi waqat hi na rahi!
Na jaane kyun...
Har sun taareeki hai
Naseh hazaar hain
Charahgar koi nahin!
Ek ajab shor bhi hai
Khaamoshi bhi...
Mustaqbil sujhai nahin deta
Aur haal, behaal hai
Maazi ki chand khurafaat
Kabhi hansaati hain
Kabhi rulati hain
Neend shab gazeedah hai
Khwaab toot rahe hain
Waqt napaidaar hai
Ahbaab hain hi nahin
Raqeeb mein khud hi hun
Mahez khila hai
Uljhi soch hai
Udaasiyon ka hamla hai
Kal shab se..!
- Khan M. Asim... 27/03/2014... 12:23 PM..!