Munfarid Asha'r..!

Koi kaam ho toh bata zara
Warna kar de zahid bayan band! Asim

***************************

Saare mausam pheeke hain tehwaron mein noor nahin
Kehne ko sab kuch hai lekin phir bhi hum masroor nahin! Asim

***************************

Zindagi se hairaan hun doosra janam dedo
Mut karo Mohabbat par thoda pyaar kum dedo! Asim

***************************

Mein jab bhi aainey se baat karta hun
Mera hi aks puche hai tera mujhse kya rishta hai! Asim

***************************

Apna mizaj shaher ke qaabil nahin raha
Mehnat ka tukda tukda haasil nahin raha
Muddat se koshishein ki Asim magar hua kya
Karne chale the ishq lekin dil nahin raha! Asim

****************************

Yeh gesuon ke hazaar jharne
Kisi ki ulfat ki daastaan hain! Asim

****************************

Raat ko nind nahin, din ko chain nahin 
Agar yeh cheez mohabbat hai tumhe Mubarak ho! Asim

****************************

Hua hum pe ulfat mein itna karam 
Na padhayi hui, na soye hi hum! Asim... 
Totally inspired from Na khuda hi mila na visale sanam... :)

****************************

Tamasha aap hi pazeib se mansub hota hai
Gar zoq khud parasti pe aake raqs kare! Asim

****************************

Samandar haath mein lekar muskurate hain
Hum unko dekhte hain, doob jaate hain! Asim

****************************

Dil doobta hai aur nahin tinke ka humko aasra
Masnui duniya hai yeh, masnui ehbaab hain! Asim

The heart is drowning, I have nothing to bank upon
Its artificial world, artificial friends..! Asim

****************************

Baat toh hai yeh sahi tumse khafa hain thode
Muskura denge, aakar ke mana lo hum ko! Asim

*****************************

Theek kaha haar gaye, aur bacha kya hum mein
Meri nawa, meri sada kitni pareshan hogi
Khoob sataya hai aur sata ley mujh ko
Zindagi ik roz tu bhi toh pasheman hogi! Asim

******************************

Dekho meri bas ik mehbooba hai
Naam uss ka haan Arpita Hai
Jab se hai dekha uss mehjabeen ko
Dil yeh mera bas uss pe fida hai! Asim

******************************

Masoom nigahon mein kuch khwaab muqayyad hain
Kuch tum se hain wabasta, kuch apna fasana hai! Asim

******************************

Inn saade waraqon mein tafseel bhi afshan hai
Kuch raaz bhi pinhan hain kuch haal bhi uryan hai! Asim

******************************

Dil yeh banjar, ujaad, sookha hai
Abar hum se Zara khafa se hain! Asim

******************************

Daridah mein, darindah sift tha woh
Zamane ki mukammal khisht tha woh
Woh khwabon ko bhi aksar nochta tha
Haan Asim bas nakame zeest tha woh! Asim

******************************

Ab koi mausam suhana nahin lagta
Ishq bhi humko diwana nahin lagta! Asim

******************************

Neem khwabidah nigah tere ruskhsaar ka aangan
Chaman kahun ya gulon ko tera aseer kahun! Asim

******************************

Itni bhi usse tameez nahin
Jise pyaar Kia usse yaad kare! Asim

******************************

Tum ko yaqeen na hoga, humein aitbaar
Phir bhi yahi kahenge humein tum se pyaar hai! Asim

******************************

Mein kehta tha sooraj hun lekin dekho doob gaya
Chanda apni zaat nahin, aur koi awqaat nahin! Asim

*******************************

Ghulamon ko yeh aazaadi na pehle Thi na ab hogi
Faqat tumko yeh haq hai bas Jo bologe woh sun lenge! Asim

*******************************

Mein bhi suraj hun roshni dunga
Tawaaf tum bhi aake karo mera! Asim

*******************************

Khud se juda hone laga hun
Mein bewafa hone laga hun! Asim

*******************************

Duniya sooni viraan hai iss bin
Iss zamaane ki jaan hai Justin
Iss zamaane ka naam hai Theodore 
Baadshaahi ki shaan hai Justin! Asim

*******************************

Kitna manoos hun tujhse kya bataon tujhko
Yeh teri hayaat faani, mera ishq javedaani! ASIM

*******************************

Koi haar jaaye na jeevan ki baazi
Bahut muskura ke na dekho aaina! Asim

*******************************

Chale jao, ke ab nahin laut ke aana
Mera aitbaar khatm mera intezaar khatam ! Asim

*******************************

Kuch na kehna koi ilaaj nahin
Aur Jo keh dun to aag lag jaaye! Asim

*******************************

Apni misaal aap hun apne Jamaal ki
Iss daure bezarar mein hun hasti kamaal ki! Asim

*******************************

Koi dil wala kya baat karega
Aapka husn hi har baat kahega! Asim

*******************************

Kabhi guftaar ghalib se kabhi irshad hum se hai
Khudaya karm kar kuch toh woh qaatil shaira bhi hai! Asim

*******************************

Bachche bade hojayein to ghar ko chod dete hain
Mohabbat badi hojaye to duniya chod dete hain..! Asim

********************************

Nigah kaisi Jo doobi ho kisi ki shaam o saahil mein
waqt hi patwaar hai faqt ishq gazidon ki! Asim

********************************

Tod diye hain sooraj meine jab bhi dekha ghoor ke unko 
Taab kahan se laate woh bhi in purnoor khayalon ki! Asim

********************************

Aasmaan pe asar la rahi hain dua
Barasta hua megh hai keh raha
Dekho ramzaan ki rahmaton ka nuzool
Pyaasi dharti ko Rabb aab hai de raha! Asim

*********************************

Kisey fursat hai Asim hum se baat karne ki
Sabhi ke kaam chalte hain karobaar waale hain! Asim

*********************************

Itne roshan hain khwab ke manzar mere
Mustaqil taak mein phirta hai sooraj meri! Asim

*********************************

Khudaya kya ghazab hai woh yun tadpaye jaata hai 
Kabhi aankhein dikhata hai kabhi sharmaye jaata hai! Asim

**********************************

Kaha rozey se meine... zara sa sabr kar
Abhi mehboob aaya hai zara deedar karne de! Asim

**********************************

Itni soorat banayi hain us ne
Salam ko woh teer kehta hai! Asim

***********************************

Mustaqil khwaab hai koi
Zindagi kahan gayi hai tu? Asim

***********************************

Ilm-e-nujoom seekh kar ishq karna chahiye
Hain sitaare kehte kuch aur wafa kuch aur hai! Asim

***********************************