Kitney behisaab hogaye hain hum..!

Kitney behisaab hogaye hain hum
Doobta aaftaab hogaye hain hum

Kaun chakhta hai ab yeh paimaana 
Koi sasti sharaab hogaye hain hum

Rukh amavas ka chaand hai koi
Hai khana kharaab hogaye hain hum

Tere jaane ka asar yeh nikla
Zindagi pe azaab hogaye hain hum

Sab pe khola libaas-e-dil hum ne
Kitney behijaab hogaye hain hum

Paas hain par woh padh nahin sakte
Koi darsi kitaab hogaye hain hum

Aagey aati thi hum se bhi khushboo
Aaj murjha gulaab hogaye hain hum

Jisney chaaha utha ke qaid kia
Koi awadhi nawaab hogaye hain hum

Soch se ASIM kya nahin hota
Kher, apna utaab hogaye hain hum!

- Khan M. Asim... 29/03/2013... 11:44 AM!