Be-qadar hum ko teri nazar chahiye ..!

Be-qadar hum ko teri nazar chahiye

Dilruba hum ko teri khabar chahiye

Justuju ho chuki koshishein ki bahut

Ab duaon mein hum ko asar chahiye

Tujh se milte rahe shaam dhalti rahi

Baat karne ko fursat se ghar chahiye

Tere hokar bhi rehte hain anjaan se

Hosla hum ko ab be-khatar chahiye

Jis pe chal ke milein hum ko dono jahan

Hum ko aisi khudaya dagar chahiye

Samar jis ke rahein sheerin sheerin sada

Aisa pur-zaiqa woh shajar chahiye

Dardmand na raho pyaar tum na karo

Saath hum ko tumhara magar chahiye

Hum ko parwa nahin log kehte hain kya

Haan zamane ko bas mal-o-zarr chahiye

Khirad mushtaq hai qalb betaab hai

Hum ko jalwa tera har paher chahiye

Mana dilkash hai yeh zindagi ka bhanvar

Paar kar de jo hum ko laher chahiye

Umr utni nahin jitni tashweesh hai

Waqt ASIM zara be-fikar chahiye!

- Khan M. Asim... 19/10/2011...02:15AM!