Mein samajhta hun..!

Tum mahez phool ho,

Naazuk,

Narm,

Hassaas

Mein samajhta tha...!

Tum mahez rang ho

mausam ka,

nazaron ka,

Isharon ka,

Mein samajhta tha...!

Tum mahez roshni ho,

Sayaron ki,

Sawakib ki

Kawakib ki

Mein samajhta tha...!

Magar,

Aye meri jaane hayaat

Patjhad mein yun muskana

Andheron se yun lad jaana

Musibat se guzar jaana...

Batata hai mujhe itna

Tumhara wujood kaamil hai

Tum mahez, nazuk narm o hassas nahin

Tum mahez range bahaar nahin

Tum mahez roshni nahin

Tum mazboot bhi ho

Tum sanjeedah bhi

Tum mein azm hai

Tum mein istaqlaal bhi

Tum rang ho kaamiyaabi ka

Tum noor ho fatehyaabi ka

Mein jaane kya samajhta tha

Na jaane tum kahan nikli

Bahut buland,

Mere khayaalon se door

Paak o shafaaf

Zindagi ki iss thokar se

Mein masroor hun

Mein jaanta hun

Tum kabhi na tootogi,

Tum yeh jung bhi jeetogi

Tum har merka sar karogi

Tum Khizaon ko palat dogi

Mein samajhta hun..!

Tum mahez khayal nahin

Tum meri haqeeqat ho

Tum meri ada bhi ho

Tum meri dua bhi ho

Tum mera wujood ho

Tum mera ghamand ho

Mein Samajhta hun..!

Na tum sa koi aaya hai

Na tum sa koi aayega

Tum hi se hai jahaan saara

Tum hi tum ho

Tum hi tum ho

Mein samajhta hun..!

- Khan M. Asim... 01/10/2011... 3:30PM!