Uski mohabbat farze kifaya..!

Meri mohabbat farze ai'n, 
Uski mohabbat farze kifaya
Jab jee chaha bhool gayi woh
Jab jee chaha dil se lagaya..!

Raat jalun mein jun parwana
Toot raha har taana baana
Khud se hui hai humko ranjish
Aks se apne hi ghabrana...
Kya bolein ab yaaron uss se
Jisne chahat ko hai dabaya
Meri mohabbat farze ai'n, 
Uski mohabbat farze kifaya..!

Dard ka ik hai lamba sehra
Ek musafir bas mein thehra
Chaaron aur hai phaila kohra
Dhundla dhundla uska chehra
Kis se ab hum raah ko poochein
Rehbar ne hum ko bhatkaya
Meri mohabbat farze ai'n, 
Uski mohabbat farze kifaya..!

Saare jungle shor macha hai
Ek shikaari aa pahuncha hai
Bheid diye hain jis ne ta'ir 
Jis ne qudrat ko nocha hai
Kis se karna uski shikayat
Jis ne jungle ko hai jalaya
Meri mohabbat farze ai'n, 
Uski mohabbat farze kifaya..!

Jis ko bakhshi sab aasaish
Uss ne ki hai hum se numaish
Phir bhi usse bair nahin hai
Hum rakhte hain neik khuwahish
Usko hum ne muaf kia hai
Jis ne ASIM ko tadpaya
Meri mohabbat farze ai'n, 
Uski mohabbat farze kifaya...
Jab jee chaha bhool gayi woh
Jab jee chaha dil se lagaya
Meri mohabbat farze ai'n, 
Uski mohabbat farze kifaya..! 

- Khan M. Asim... 05/01/2013... 12:11 AM..!